ليها اكتر من طريقه وكلهم اسهل من بعض
ممكن تتعمل باللحمه المفرومه وكمان ممكن تتعمل ب الفراخ وكمان ممكن تتعمل بالخضار فقط
خلينا نبتدي بالخضار اورديحي او بالفراخ علشان تقريبا الطريقتين زي بعض
اولا كده هتجيبي الخضار بتاعك وتغسليه وتقطعيه شرايح وهيكون عباره عن بطاطس وكوسه وجزر و طماطم ، دول اساسي وممكن نضيف بقا باذنجان وبصل و اي نوع خضار تاني زي ما تحبي ، و ده مش اساسي
هنجيب الصينيه و نرص فيها الخضار بتاعنا بالطريقه اللي نحبها وبعدين هنجيب الخلاط ونضرب طماطم مع قرن فلفل شطه مع معلقتين صلصله جاهزه مع معلقتين زيت مع ملح وفلفل اسمر و بابريكا و روز ماري و بصل بودر و ثوم بودر ، لو هنعملها بالفراخ هنجيب فرخه ونقطعها ٤ أو ٨ وبعدين ندعكها بالخليط ده كويس و فوق الجلد وتحت الجلد وبعدين نرص الفراخ علي الخضار ونسقي الصينيه بباقي العصير ، لو مفيش فراخ هنسقي الصينيه بالعصير علي طول ونغطيها ونحطها علي النار شويه لحد ما تشرب المياه اللي فيها وبعدين ندخلها الفرن تتحمر كده وتكمل سوااا ،، دي كانت طريقتها اورديحي او بالفراخ
نيجي بقا للطريقه اللي باللحمه المفرومه ، دي كمان ليها طريقتين ، الأولي هنجيب اللحمه ونعصجها ببصله محمره وبعدين نفرشها في الصينيه وعليها الخضار وبعدين نسقيهم بالعصير بتاعنا وندخلهم الفرن يستووو وخلاص
الطريقه التانيه بقا مختلفه شويه
هنجيب اللحمه المفرومه ونطبخها ، او هنطبخها زي اللحمه بتاعة المكرونه البشاميل ، هنجيب الخضار نرصه في الصينيه ونطبخ اللحمه ، لو مش هتعرفي تطبيخها يبقا عصجيها وانزلي عليها بالعصير بتاعك وسبيها لحد ما تستوي وتشرب الميه خالص وتنشف ،، دي طريقه سهله لطبخها ، هنفرش اللحمه في الصينية ونرص عليها الخضار ونغطيها بورق زبده او فويل وتدخل الفرن لحد ما تستوي وبعدين نشيل من عليها الورقه ونسبها تاخد لون
بس كده هي دي طرق ووصفات الخلطبيطه بالصلصه اللي ناس كتير مصتصعباها وبتعقدها
ليست هناك تعليقات:
إرسال تعليق