كحك العيد الصحى 🥮🎊🎈

"  كحك العيد الصحى 🥮🎊🎈"

( الكحك صحي من غير دقيق أبيض ومن غير سكر ❌ )

* الوصفة بدقيق القمح الشوفان مع دقيق القمح الكامل والسمن البلدي 🌾😋..

* نزلت الوصفة بدري عشان الوقت في رمضان بيبقى ضيق وغالبًا مش بقدر أنزل فيه حاجة 🎉..

* الملاحظات والتفاصيل على الصور مهمة ❗️🔺🔺🔺..

 كحك العيد الصحى 🥮🎊🎈

• المكونات 📝:
- كوب ونصف دقيق شوفان ..
- كوب دقيق قمح كامل ..
( ممكن العكس كوب ونصف قمح كامل وكوب شوفان وممكن كميات متساوية وممكن نبدل ٢ ملعقة كبيرة بنشا ذرة )
- ملعقة كبيرة عسل نحل ..
- نصف كوب سمن بلدي ( هنسخنها لغاية ما تعمل صوت تكتكة وهستخدمها سخنة ) ..
- ملعقة صغيرة ممسوحة باكينج بودر ..
- ملعقة صغيرة ممسوحة ريحة كحك ..
- ملعقة صغيرة خميرة ..
- ربع كوب ماء دافئ ..
- ٢ ملعقة كبيرة سمسم محمص ..
- رشة ملح صغيرة جدًا جدًا ..


• طريقة التحضير والتشكيل 🥣:
- موجودة على الصور 📸

أول حاجة هقلب الخميرة مع العسل والميا الدافية وهسيبهم يتفاعلوا على جنب .. 😊

- هقلب دقيق القمح والشوفان مع السمسم وريحة الكحك ورشة الملح ..

- هنزل عليهم بالسمنة وهي سخنة ( مقدوحة ).. وهقلبها مع الدقيق كويس ..
- لما تختلط مع الدقيق هتكون بردت ..

- بفضل أعملها بإيدي أو سباتيولا سيليكون بحيث أتأكد إن كل حبات الدقيق تشربت السمن .. وبيكون شكلها كدا ..

- هنزل بخليط الخميرة وألم بيه العجينة بسرعة ( ف الخطوة دي مش هعجن كتير خالص عشان يفضل ناعم ..

- دا شكل العجينة .. ( أنواع الدقيق مليانة ألياف مع الوقت هتتشرب السايل ف العجينة وتبدأ تشقق ف أنا هبدأ أشكل علطول وهغطيها بكيس بلاستيك وأنا بشتغل ) 🔺🔺🔺

هاخد كورة صغيرة من العجين وهعمل حاجة من اتنين 🔺🔺
هبل الكورة من برا بميا أو بنقطة سمن ..
وبعدين هبدأ أشكلها ودا هيخليها متشققش معايا .. 🤩

- هنا دي نقطة سمن بس الصورة مكبرة .. وحجم كورة العجين ملعقة شاي مليانة ..
- بدهن كل الكورة بالسمن دي فلما بفرد الكورة مش بتشقق معايا ..
( ممكن سمن وممكن ميا ) 🔺🔺🔺

- برتبهم ف قالب مدهون سمن خفيف .. وواضح ف الصور الفرق بين اللي دهنتهم ميا أو سمن واللي شكلتهم من غير حاجة ( فيهم تشققات خفيفة ) 🔺🔺🔺
- عملت الشكل دا ببصامة الكحك .. 🥮
- هندخله فرن سخن على ١٨٠ لغاية ما ياخد لون دهبي من تحت ( الوقت بيفرق من فرن للتاني فمش قادرة أحدد وحسب حجم الكحكاية )

 كحك العيد الصحى 🥮🎊🎈

• ملاحظات❗️:
* لو عملنا الكحك بدقيق شوفان بس هيطلع ناعم جدًا جدًا .. وأظن السبب إن الشوفان خالي جلوتين فدا بيقلل من تماسكه ..
* لو عملناه بدقيق قمح كامل بس .. يفضل نكتفي ب ٢ كوب دقيق مع كمية السمن دي .. ( بيكون أقل في النعومة لكن حلو بردو )
* لو العجينة فضلت ناشفة ومشققة جامد بعد ما ضيفنا الميا مع الخميرة .. ممكن نزود لغاية ربع كوب ميا كمان بالتدريج .. لو فضلت ناشفة مش مشكلة .. هتتطرى وتتشكل معاكي بالطريقة اللي وضحتها في التشكيل ..
*ممكن الكمية الأكبر تكون دقيق قمح كامل مش دقيق شوفان .. ( حسب ما نحب )
* خطوة طريقة التشكيل على الصور في ملاحظة مهمة جدًا ❗️🔺🔺🔺🔺🔺
* يفضل الكحكات تكون رفيعة شوية ودا هيسهل التسوية ..
* الكحك بيكون لونه دهبي من تحت وفاتح من فوق إلا لو حابين غير كدا .. وأول ما بيطلع من الفرن بيكون طري .. وبينشف لما يبرد ..
* الكحك مش بنحركه من الصينية بعد ما يخرج من الفرن قبل خمس أو عشر دقايق ..
* مهم لما يبرد خالص نشيله ف علبة مقفولة كويس ..
* الكحك مشبع جدًا جدًا بسبب الألياف فيه غير كحك الدقيق الأبيض .. أظن اتنين بالحجم الصغير دا هيكونوا مشبعين جدًا
😋
* الكحك تاني يوم طعمه بيكون أحلى 😍
* المقدار بيعمل من ٣٠ ل ٣٢ كحكاية بحجم صغير ..
وبألف هنا 😋🎉💕

تابعينا على الفيسبوك من هنا :https://www.facebook.com/saidty1/