بسكوت العيد الصحى 🥮🍊🌱 بالبرتقال والينسون

 بسكوت العيد الصحى 🥮🍊🌱 بالبرتقال والينسون

" بسكوت العيد 🥮🍊🌱" بالبرتقال والينسون

( البسكوت بمكونات صحية خالي من السكر أو الدقيق الأبيض ..
بدقيق الشوفان والقمح الكامل🌾 )

* حبيت جدًا نتيجة خلط نوعين الدقيق مع بعض في حلويات العيد .. دقيق القمح الكامل بيدي تماسك للقوام .. ودقيق الشوفان بيدي نعومة لانه مفيهوش (عِرق ) بلغة الخبازين 👩🏻‍🍳😄

* الوصفة سهلة جدًا .. والنتيجة حلوة أوي .. وريحته بس تحفففة .. 😋

* شكلت البسكوت من غير ماكينة أو قمع وممكن نعمله بأي شكل .. 🥮

 بسكوت العيد الصحى 🥮🍊🌱 بالبرتقال والينسون

• المكونات 📝:

- كوب دقيق قمح كامل🌾
- كوب دقيق شوفان🌾 (+ نصف كوب إحتياطي )
- ٢ ملعقة كبيرة نشا ..🥄🥄
- نصف كوب زبدة بلدي🧈 + زيت زيتون 🍾( ممكن التلت يكون زبدة ونكمل باقي النص كوباية بزيت زيتون )
- نصف كوب عسل نحل 🍯( ممكن نقلله للتلت لو بنحب التحلية خفيفة خصوصا إن الشمر والينسون ليهم نكهة بتناسب السكر الخفيف وممكن نخلي التحلية عسل مع سكر ستيڤيا )
- بيضة🥚
- ملعقة صغيرة بشر برتقال🍊
- ملعقة صغيرة أو أكتر 🌱( شمر وينسون مطحون ناعم )
- رشة ملح🧂
- ڤانيليا 🌼( بشر البرتقال يغني عنها بس بفضل أضيفها )
- ملعقة صغيرة باكينج بودر🥄

• طريقة التحضير 🥣:
هشرحها على الصور 📸

 الزبدة تكون طرية لكن ( مش سايحة ) .. هضربها بالمضرب مع الزيت دقيقة أو اتنين تقريبًا لغاية ما تبقى كريمي كدا ..
- بالتدريج هضيف العسل ( مش مرة واحدة عشان ميهبطش الزبدة ) لغاية ما يندمجوا ..
- الزبدة فاتحة لانها بيضا ( جاموسي ) لو بقري بتكون صفرا شوية

- هضيف البيضة والفانيليا وبشر البرتقال .. وهضرب تاني ..

- هضيف ( كوباية من الدقيق + النشا + الشمر والينسون + الباكينج بودر + رشة الملح ) وهقلب بسباتيولا أو ملعقة مناسبة .. لغاية ما يندمجوا ..

- هضيف الكوباية التانية .. وأقلب ..

- غالبا هيكون لسه في تلزيق بسيط .. ( حسب كمية العسل )
- هبدأ أضيف الدقيق ملعقة بملعقة .. لغاية ما التلزيق يروح أو يبقى بسيط جدا جدا .. يعني لو لمستها بايدي النظيفة من العجين والناشفة متلزقش ..

- كدا العجينة جاهزة للتشكيل .. 🤩

هفرد العجينة بين طبقتين من البلاستيك كدا .. المفروض متلزقش .. ( ممكن ندهنها زيت خفيف جدا )

هستخدم مسطرة وقطاعة البيتزا .. وهعمل علامات كدا من فوق الكيس ..

تقريبا عرض كل بسكوتة ٣ سم .. وطولها ٧،٥ - ٨ سم ..

نقسم بيها

كل التقسيم مجرد علامات من فوق الكيس ..

- هشيل العجينة كلها كدا على صينية .. وهغطيها بالبلاستيك تاني .. وهدخلها التلاجة عشر دقايق لغاية ما تبرد وتتماسك .. وهشغل الفرن على ١٨٠ ..
- لما تطلع من التلاجة هقطعها .. وهشيلها بسهولة أرتبها ف الصينية المدهونة زيت أو زبدة خفيف ..
- ضروري مقطعهاش ومحركهاش غير بعد ما تبرد في التلاجة عشان ممكن تتقطع مننا ..

 بسكوت العيد الصحى 🥮🍊🌱 بالبرتقال والينسون

• ملاحظات📍:
* كل المكونات تكون بدرجة حرارة الغرفة .. الزبدة تكون طرية لكن باردة ( مش سايحة أوي لو الجو حر يعني )

* في بسكوت البرتقال بستخدم زيت مع الزبدة لانه بيدي البسكوت قوام أو قرمشة جميلة مع نعومة ونكهة الزبدة .. كمان بيليق أوي مع نكهة البرتقال والينسون والشمر .. بس طبعا دا اختياري ..

* نص كوب الدقيق الأخير بضيفه بالتدريج ملعقة بملعقة عشان العجينة متطلع ناشفة من زيادة الدقيق ..

* لو العجينة بتشقق جامد .. ضيفي ليها ملعقتين ميا أو لبن ف الآخر ( متزوديش عن ربع كوب بالتدريج )

* البسكوتات بتدخل فرن حرارته ١٨٠ و لو عالي ١٧٠ .. على الرف اللي ف النص .. بنشغل من تحت بس .. وبنراقب البسكوت لو أول مرة نعمله عشان نعرف بياخد وقت قد ايه ف الفرن بتاعنا .. ولو البسكوته احمرت من تحت .. بنشغل الشواية دقيقة تاخد لون من فوق واحنا  قدامها 🔥

تابعينا على الفيسبوك من هنا : https://www.facebook.com/saidty1/