أحلى وأسهل وصفة جبنة

وصفة جبنة

" جبنة سبريد بيتي "

* أظن دي أسهل وأسرع وأضمن طريقة هتوفرلنا بديل صحي لجبنة سهلة الفرد هتنفع في الفطار أو العشا أو في ساندويتشات المدرسة وطعمها حلو جدًا .. 

* صحية ومش مكلفة وبتاخد خمس دقايق تحضير بس ونقدر نغير في النكهات حسب الذوق والمزاج .. 

* المكون الأساسي هيكون الجبنة القريش .. ( طعمها بيتغير جدًا بالطريقة دي وبإذن الله الأطفال هيحبوها )

• المكونات :

- قطعة جبنة قريش ( تقريبا وزنها ربع كيلو نجيبها من مكان كويس وتكون طرية مش ناشفة )

- ربع كوب حليب ( أو أكتر )

- ملعقة زيت زيتون أو زبدة بدرجة حرارة الغرفة ( إختياري )

• إضافات مقترحة :

- زيتون أخضر أو أسود ( ويفضل نفرمهم الأول وبعدين نضيف عليهم الجبنة )

- فلفل أخضر أو ألوان أو حراق .. ( ويفضل نفرمه الأول وبعدين نضيف عليه الجبنة )

- بابريكا وكركم وشطة ..

- زعتر ناشف أو إخضر أو بردقوش ..

- بقدونس أو شبت أو كسبرة أو بصل أخضر ( نقطعم صغير أو نفرمهم )

- زيت زيتون

• طريقة التحضير :

- في الكبة هنقطع الجبنة ونضيف ليها ربع كوب حليب ونضرب ونضيف الزيت .. وممكن نزود لو احتاجت..

- هنضيف التوابل ونقلبها معاها ونشيلها في علبة في التلاجة هتتماسك أكتر وهتندمج مع الإضافات .. 

• ملاحظات :

* لو حابين الفلفل أو الزيتون مفروم جدًا .. يبقى نفرمهم الأول.. وبعدين نضيف الجبنة..

* خلي القوام سايل شوية عشان بتتماسك أكتر في التلاجة ..

* ممكن تقلبيها قبل التقديم ..

* لو الكمية كبيرة وهتقعد أكتر من خمس أيام في التلاجة .. الأفضل تسيبي كمية صغيرة ف التلاجة والباقي تشيله في الفريزر ..

* لو ملح الزيتون زيادة .. انقعيه شوية في ميه ..

وبالهنا 😋😍
للمزيد من المواضيع زوروا موقعنا 👇
https://saidtyweb.blogspot.com/
تابعونا علي جروب الفيسبوك 👇
https://bit.ly/3D9X4uf