كل ما تحاولين معرفته عن مرض الفطر الأسود

 هل اصبح الفطر الأسود مرض مسبب للهلع

الإجابة طبعا لأ، لإنه حتي الأن مفيش غير حالة او اثنين منه في مجتمعنا فقط و مفيش داعي ان احنا ننشر في تفاصيل منقوصة او غير مدروسة عن المرض حتي ولو بغرض التوعية

يا ننقل الموضوع كامل يا بلاش

ولكن امتي الفطر الأسود يبقي مصدرا للهلع

إذا انتشر في المستشفيات و مكنش في تعقيم كافي لإنه بينتقل من اجهزة التنفس الصناعي او انابيب التنفس الحاملة للفطر من النوع الاسود، و دا بإذن الله مش هيحصل، واذا كنت مرافق مع شخص مصاب بفيروس كورنا في احد المستشفيات، اتأكد ان تم التعقيم للأجهزة المستخدمة ليه

هل الفطر الاسود منتشر حوالينا في الجو

الفطر الأسود زي ما قلنا نوع واحد من انواع فطريات كتير، ومش بيبقي موجود غير في البيئات الرطبة اوي زي التربة الزراعية، و ممكن يتواجد في وسط اتربة المنازل اللي تحت الهدم او الإنشاء

طيب هل المصاب ممكن يعدي غيره بالفطر الأسود

الإجابة لأ، المصاب بالفطر الأسود لا يمكن انه يعدي آخرين بنفس الفطر او المرض هو يا هيصاب بيه من جهاز تنفس ودا الاكثر شيوعا او من الهواء مباشرة و دي نسبة معدومة بالفعل

طيب هل السواد اللي بيكون جوة الخضار زي البصل دا فطر اسود

الإجابة لأ لكن طبعا هو نوع من الفطر برضو ولو لقيتي سواد زي كدة في خضار او فاكهة او مأكولات فالأفضل انك تتخلصي منها فورا

طيب نعمل ايه عشان نتجنب موضوع الفطر الأسود دا و نفضل في أمان منه

اولا لازم نهتم بالنظافة العامة جدا زي ما كنا في بداية انتشار فيروس كورونا، ننظف الاركان، الاسطح، نغسل الاكل كويس، والاهم طبعا غسيل اليدين و الوجه بمياه و صابون كتير

ثانيا بلاش نلبس الكمامات المستخدمة، لإن النفس و طرق الإحتفاظ الغلط بتسبب فطريات و انتشار للبكتيريا علي سطح الكمامة اللي بنحطه علي وشنا، فيفضل نشتري الكمامات القماش و نغسلها كويس لو حابين إعادة الإستخدام و التوفير

ثالثا، اهتموا بكبار السن و بنفسكم اوي لو عندكم نقص مناعة، ياريت نهتم بصحتنا جدا جدا و نبتعد عن الزحمه و الإختلاط بمصابين

رابعا، الإهتمام بمرضي الامراض المزمنة و خصوصا القلب و السكر و القدم السكري و الأورام و نفص المناعة

خامسا، اهتموا بالأطفال و الحوامل و متعرضوهمش للزحام او الإختلاط الكتير

وكل دا عشان نتجنب من الأساس الإصابة بمرض #كوفيدـ١٩ مش الفطر الاسود، بمعني اصح عشان نتجنب انابيب الاوكسجين و المستشفيات و التلوث و نحمي مناعتنا

ودا اصلا هيحصل لو بدأنا كلنا نتطعم ضد فيروس كورونا بالأمصال المتوفرة، لإن دا بيضمن المناعة القصوي ضد مرض كورونا وبالتالي هيبقي مفيش اي داعي للقلق و التوتر الشديد من #الفطر_الأسود