بيتزا محشيه الأطراف

 بيتزا محشيه الأطراف 

المقادير
٣كوبيات دقيق
كوبايه لبن
كوبايه ميه
وعلبه زبادي
٣معالق زيت زيتون
معلقين كبيرة خميرة (كيس ونص يعني )
معلقه سكر كبيرة
معلقه ملح صغيرة
ورشة توم بودر

الطريقة
هاتي كوب اللبن ويكون دافي وحطي معاه معلقة السكر والزيت والخميرة وسبيهم عشر دقايق عشان يخمروا وبعد كده هاتي الدقيق وعليه معلقة الملح ورشة التوم البورد وابدائي انزلي باللبن علي الدقيق واعجني وضيفي الزبادي وكملي عجن لحد ما ملمسها يبقي نااااعم وطبعا لو عندك عجان اعجنيها فيه ، وسبيها تخمر ساعتين لحد ما حجمها يتضاعف وبعدها ابدائي تاخدي جزء من العجين وافرديه بالنشابة وتكون العجينة سُمكها وسط واديها بالشوكة شكتين كده ونجيب بقا قطع عجين صغيرة خالص ونحط جواها قطع موزاريلا ونقفلها ونحطها علي أطراف العجينة لحد ما نعمل كل الاطراف وادهنيهم بلبن عشان متنشفش وتكوني مجهزة ملعقتين صلصلة علي ملعقتين كاتشب ورشة زعتر ورشة توم بودرة واخلطيهم علي بعض وخدي منهم معلقة وافرديها علي العجين وبعد كده حطي الحشوة اللي تعجبك وبعدها الفلفل والزيتون وعليهم جبنة ميكس وعليها موزاريلا او موزاريلا بس زي ما تحبي وحطيهم الفرن ربع ساعة لحد ما العجين يستوي وشغلي الشواية كام دقيقة ف الآخر الجبنة تاخد لون ولااازم العجينة تتعجن كويس جدا لحد ما يبقي ملمسها ناااااعم وكماااان تاخد حقها في الخمر وحجمها يتضاعف
اضافة تانية أحب اقولها عشان تخمير العجينة ، لازم تكون العجينة في مكان دافي ومتغطية بكيس سواء بقا استرتش او كيس عادي ويكون عليه فوطة كمان
ولازم ندهن الصينية بزيت بسيط خالص قبل ما نحط فيها العجينة والكمية دي ياجماعة تكفي صنين او ٣صواني

• عجينة البيتزا
يا اما تتعجن بلبن حليب او لبن بودر لو حباها طريه يبقي اعجنيها بلبن حليب حباها كرسبي يبقي لبن بودر
• تاني حاجة الخميرة
ودي مهمة جدا في العجينة وانا بفضل خميرة دريم
• تالت حاجة الجبنة
لازم تكوني بتستخدمي نوع كويس بيسيح وتاني حاجة لازم تكون الجبنة بدرجة حرارة الغرفة يعني متكونش لسه طالعة من الفريزر مثلا وتستخدميها ، تالت حاجة خليكي كريمة شوية وانتي بتحطي الجبنة عشان تغطي وش البيتزا
•رابع حاجة التسوية
أقصي وقت للبيتزا جوه الفرن تلت ساعة ده يعني لو الفرن بتاعك هادي أوي اوي يعني الطبيعي انها تكون في فرن وسط او عالي عن الوسط شوية وتقعد تلت ساعة بالكتير جدا ونشوف العجين من تحت أول ما تلاقيها بدأت تاخد اللون الدهبي والموتزرلا من فوق ساحت هنروح مشغلين الشواية حوالي خمس دقايق بالكتير الموتزرلا تاخد لون