* وصفة سهلة وجميلة ومفيدة وكتيييير مننا بنحبها وهتطلع جميلة أوي .. وأخف من القلي بكتير ..
• المكونات
:
- ٢ باذجان كبير ( أو ٤ صغيرين ) مقطع شرايح في حدود ١ سم ..
- ٢ ملعقة زيت زيتون ..
• مكونات التتبيلة
:
( ممكن نحضرها بالطريقة والمكونات اللي نحبها .. دي مقترحة ) ..
- ربع كوب زيت زيتون ( ممكن نقلله لو حابين نقلل السعرات )
- ٣ ملاعق كبيرة خل ..
- عصير ٢ ليمون ..
- ٢ لو ٣ فصوص توم كبيرة مفرومة ..
- ملعقة صغيرة مليانة ملح ..
- ملعقة صغيرة كسبرة ..
- ملعقة صغيرة بابريكا ..
- نصف ملعقة صغيرة كمون ..
- ربع ملعقة صغيرة فلفل أسود ..
- عودين بقدونس مفطع قطع صغيرة ..
- فلفل أحمر أو أخضر أو شطة مفروم أو مقطع قطع صغيرة ..
( هنخلط كل المكونات دي ببعض هتبقى عندي التتبيلة جاهزة )
- ملعقة صغيرة دبس تمر أو عسل (اختياري )
• طريقة تسوية وتحضير الباذنجان
:
- هنسخن الطاسة .. وندهنها مسحة زيت .. وعلى نار ما بين المتوسطة والهادية .. هرتب شرايح الباذنجان ( ممكن نغطي عليه ٣ دقايق ) ..
- لما تبدأ تاخد لون من تحت .. هضغط عليهم بسباتيولا أو شوكة ( زي ما هو موضح في الصورة .. الخطوة دي مهمة ) ممكن نسمع صوت ( تششش) ودا لان السائل بينزل منها ويساعدها تستوي ..
- لما تاخد لون حلو من تحت .. هدهن الوش زيت بفرشاة وهقلبها ( ممكن نستغني عن الخطوة دي بس بتخلي اللون أحلى )
- بعد دقيقتين هكرر نفس خطوة الضغط على كل شريحة .. ولما تاخد لون دهبي غامق .. وتبقى طرية يبقى كدا استوت ..
- لو خدت لون ولسه ناشفة .. بقلل النار وأغطي شوية ..
- لو استوت ولسه فاتحة بزود النار شوية ..
* كدا شرايح الباذنجان جاهزة أنزل بيها واحدة واحدة ف التتبيلة واتأكد إنها اتشربت منها من الناحيتين وارتبتهم ف طبق ..
* لما نخلص كل الكمية لو فاضل من التتبيلة هضيفها للباذنجان .. وهغطي عليهم شوية قبل التقديم عشان يتشرب من التتبيلة ويبقى جميل
وممكن نشيله ف علبة لما يبرد ويدخل التلاجة ..
ريحته تحففففة وطعمه جميل جدًا ..
ليست هناك تعليقات:
إرسال تعليق