شوربة المشروم اللذيذة 😋🍲

وصفة انهرده هتكون " شوربة المشروم 😋🍲"
وهقدمها بطريقتين ✌🏻..

* طريقة بقوامها الكريمي الجميل وطريقة هنسيب فيها قطع المشروم زي ما هي بقوام شوربة جميل جدًا معاها 😍..

* مش بستخدم فيها كريمة لان نسبة الدسم فيها عالي جدًا .. ف بكتفي إني أستخدمها في الحلويات ..

• المكونات 📝:- طبق مشروم ٢٠٠ جم ( ٢ كوب مشروم مقطع شرايح )
- بصلة متوسطة أو كبيرة ..
- ٢ ملعقة كبيرة مليانة دقيق قمح كامل ..
- ٢ كوب شوربة- كوب حليب
- ٣ ملاعق كبيرة زيت زيتون ( ممكن نبدل واحدة منهم بملعقة صغيرة زبدة أو سمن )
- ملعقة صغيرة ملح ( ممكن أقل حسب الملح ف الشوربة )
- ربع ملعقة صغيرة فلفل أسود ..
- ممكن نضيف رشة من الزعتر أو أي توابل نحبها لكن اللي بيفضل طعم المشروم يكتفي بالفلفل الأسود ..
- بقدونس أو كسيرة للتقديم ..



• طريقة التحضير 🥣:
موجودة على الصور ومعاها الملاحظات .. 😍

بقدمهم ع الوش بالشكل دا مع رشة بقدونس .. وبألف هنا .. 😍

- أو خطوة .. بقطع البصل قطع كبيرة كبيرة وأشوحهم كويس ف ملعقتين من الزيت .. لغاية ما ريحتهم تطلعهم ويبدأوا يلونوا ..

ممكن أشيل شرايح ٣ أو ٤ مشروم .. وأشوحهم كدا ف شوية زيت ..

مع رشة ملح وفلفل أسود .. 🧂

- بضيف شرايح المشروم للبصل .. وبكمل تشويح ..

- كدا البصل مع المشروم خدوا لون دهبي جميل .. وريحتهم حلوة جدًا ف المرحلة دي 😍

بوزع الدقيق كدا .. وبقلبه مع البصل والمشروم .. وف المرحلة دي بضيف تالت ملعقة من الزيت أو بدلها ملعقة صغيرة سمن أو زبدة ..

- هضيف ف المرحلة دي ٢ كوب الشوربة ( ممكن كوب شوربة وكوب حليب )
- لو الحليب أكتر لونها بيكون أفتح والعكس ..
- لما تبدأ تغلي هغطي عليها وهوطي النار .. هتقعد تقريبا عشر دقايق ..
- هعرف إنها استوت لما بلاقي البصلة طرية خالص ..

دا شكلها بعد ما استوت ..

هضيف تالت كوب من الحليب .. وهضبط الملح والفلفل ..
ويا إما هسيبها كدا بقطع المشروم والبصل فيها .. ( تاخد غلوة بس مع الحليب الإضافي )

بقى دا شكلها ..
قوامها مضبوط 😋
لو حابينه أتقل .. بندوب ملعقة أو اتنين صغيرين من الدقيق ف ربع كوب حليب .. ونضيفهم للخليط ونقلب ونسيبه يغلي غلوة ..

يا إما .. هضربها ف الخلاط بالحليب وهو بارد ( عشان يقلل الحرارة وأنا بضربها ف الخلاط) لغاية ما تنعم جدًا .. وبعدين هرجعها للحلة وأضيف الملح والفلفل وأسيبها تاخد غلوة وأقدمها .. 😍♥️
- كوب الحليب البارد بيقلل درجة حرارة الشوربة .. ف أقدر أحطها ف الخلاط عادي .. لكن ممكن كمان أشيل الجزء الصغير اللي ف الغطا عشان أسمح بخروج البخار ..

بقي دا شكلها .. 😍

دا شكل الشوربة مع القطع .. 😍

ودا شكلها وهي كريمي 😋

تابعينا على الفيسبوك من هنا