أكلات تساعدك في تخفيف ألم المفاصل!

 أكلات تساعدك في تخفيف ألم المفاصل!

الأكل اللي بناكله كل يوم يقدر يساعدنا في الوقاية من مشاكل صحية كتير وكمان يساعد في علاجها. ومن ضمن المشاكل دي آلام والتهابات المفاصل اللي ناس كتير بتشتكي منها، هنقدملك سيدتي الاكلات اللي ممكن تساعدك في التخفيف من الام المفاصل

1# أسماك المياه الباردة

سمك المياه الباردة زي السلمون والتونة والماكريل والسردين يعتبروا مصدر ممتاز للأوميجا 3 اللي بتقلل البروتينات الالتهابية في الجسم وبالتالي بتساعد في الوقاية من التهاب المفاصل وبتقلل من حدته. 

2# المكسرات والبذور

المكسرات والبذور من المصادر النباتية اللي فيها نسبة أوميجا 3 عالية نقدر نعتمد عليها في تخفيف التهابات المفاصل والألم أو الالتهاب في الأنسجة الضامة. 

3# الخضروات من عيلة الكرنب

الكرنب والقرنبيط والبروكلي والخس، كلها مجموعة خضار غنية بالألياف والعناصر الغذائية المهمة لتدعيم الجسم ضد الألم. الميزة الأهم للخضار دي هي إنها بتحارب الإنزيم اللي بيتسبب في ورم المفاصل والتهابها بشكل طبيعي.

4# الفواكه

يعتبر التوت الأزرق أكتر فاكهة فعالة في تقليل التهاب المفاصل، للإنه بيقلل استجابة الجسم للالتهابات بشكل عام. كذلك االتفاح والأناناس من أكتر الفواكه الغنية بالألياف ومضادات الالتهابات اللي بتخفف من التهاب المفاصل وبتقلل الألم.

5# زيت الزيتون

مش بس ليه خصائص مضادة للالتهاب وغني بالأوميجا 3 المفيدة للالتهابات والجسم عموما، لكن كمان الاعتماد على زيت الزيتون بيحمي من خطر الالتهابات اللي ممكن تسببها الزيوت النباتية التانية اللي بنستخدمها في الأكل والطبخ وبتزود الالتهابات.

6# البقوليات

العدس والفول والفاصوليا الحمرا والسودا والحمص وفول الصويا، كلها مصادر مهة للأنثوسياسين، نوع من مواد فعالة اسمها الفلافونويدات اللي بتقلل الالتهابات.

7# الخضروات الجذرية

التوم والبصل والجنزبيل والكركم ليها خصائص مضادة للالتهابات بشكل فعال. في دراسات أثبتت إن إدخال الخضار ده في الأكل اللي بناكله بيقلل الألم الناتج من التهابات المفاصل والآلام التانية المرتبطة بالمفاصل!

8# شوربة الكوارع

بما إن العضم فيه الكالسيوم والجلوكوزامين والأحماض الأمينية والكولاجين اللي احنا محتاجينهم عشان قوة وسلامة الأربطة والعضم والغضاريف، شوربة العضم أو الكوارع بتدينا العناصر الأساسية دي بشكل مباشر. وده بيقوي الجسم ويدعم المفاصل ويخفف من الالتهابات والألم.

9# الشوكولاتة الدارك

الكاكاو فيه مضادات أكسدة ومضادات التهاب قوية بتدعم الجسم وتقلل الاستجابة للالتهابات وبتخفف آلام المفاصل. لكن لازم تكون الشوكولاتة فيها أكتر من 70% كاكاو ونسبة سكريات ودهون قليلة وناكلها باعتدال مش بكميات كبيرة.