أسباب فساد الاكل في التلاجة

أسباب فساد الاكل  في التلاجة

9 أسباب بيخلوا الأكل يبوظ في التلاجة

كلنا فاكرين إن مجرد دخول الأكل في التلاجة هيحافظ عليه، لكن بنتفاجئ كتير بإن الأكل بيبوظ جوه التلاجة! عشان كده جمعنا لكم الأسباب اللي بتخلي الأكل يبوظ وازاي نخزن الأكل صح!

1# البكتيريا في بواقي الأكل

لما ندوق الأكل لازم نحرص على إننا مانحطش نفس المعلقة أو الحاجة اللي أكلنا بيها تاني في الأكل لإنها كده هتنقل البكتيريا من بُقنا للأكل وهتخليه يبوظ حتى وهو في التلاجة.

2# حرارة التلاجة الغلط

من أهم الأسباب اللي تخلي الأكل يبوظ بسرعة في التلاجة إن التلاجة ماتكونش ساقعة كفاية! لازم نظبط درجة حرارة التلاجة أقل من 4 درجات مئوية عشان نضمن إن مفيش بكتيريا تقدر تعيش وتبوظ الأكل. دايما نركز في إن التلاجة بتسقع كويس فعلا وللا محتاجة صيانة أو ظبط، لإن أداء التلاجة بيتأثر بالاستخدام والحر وخصوصا لو باب التلاجة بيفضل مفتوح كتير.

3# تخزين الأكل كله مع بعضه

الأكل لازم يتفصل عن بعضه كويس في التلاجة لإن صلاحية وطبيعة كل أكلة مختلفة عن غيرها. مينفعش نسيب البكتيريا تتنقل من أي أكل للتاني، لازم الخضار يتفصل عن الفاكهة، واللحوم تتفصل في علب مقفولة كويس في رف منفصل، ويستحسن ما نخزنش الخضرة في اكياس بلاسيتك، الأعشاب ممكن نقطع جذورها ونغطسها في كوباية مياه، أو نلفها في مناديل مطبخ جوه الكيس البلاستيك عشان ما ترطبش بسرعة وتبوظ.

4# غسل الأكل أول ما نشتريه

المفروض إن الخضار أو الفاكهة يتغسلو ا قبل الأكل مباشرة مش أول ما نشتريهم. غسل الخضار والفاكهة قبل ما يتحطوا في التلاجة بيسرع نمو البكتيريا عليهم وبيخليهم يرطبّوا بسرعة أكتر وبيقلل عمرهم في التلاجة. الأحسن إننا نمسحهم بس ونغسلهم قبل الاستخدام مباشرةً.

5# تخزين أكل غلط في باب التلاجة

خلينا متفقين الأول إن باب التلاجة مش مفروض يتفتح كل شوية ولا يفضل مفتوح كتير عشان ما يأثرش على البرودة في التلاجة ويسبب بوظان الأكل. لازم كمان نعرف إن درجة الحرارة في باب التلاجة أعلى من باقي التلاجة، يعني الباب مش برد كفاية لتخزين البيض أو اللبن أو المنتجات اللي محتاجة برودة عالية، لإنها ممكن تبوظ هناك بسرعة.

6# تخزين كل حاجة في التلاجة

التلاجة مش المكان المناسب لتخزين كل أنواع الأكل. بالعكس، في أكل كتير مفروض يتخزن في حرارة الغرفة وما يدخلش التلاجة لإنه بينتج غازات ممكن تأثر على الأكل التاني وتبوظه!

7# دخول أكل سخن جوه التلاجة

مفروض الأكل يبرد قبل ما يدخل التلاجة، يكون في حرارة الغرفة أو أدفى حاجة بسيطة، ماندخلوش التلاجة وهو سخن عشان ما يسببش خلل في درجة برودة التلاجة والأكل الي فيها. مع مراعاة إنه ما يفضلش بره التلاجة كتير.

8# تأخير دخول الأكل في التلاجة

زي ما قلنا لازم الأكل يبرد قبل ما يدخل التلاجة، لكن في نفس الوقت ما ينفعش نسيبه بره أكتر من ساعتين. الحل إننا نبرد الأكل بسرعة، ننقله من الحلة اللي طبخناه فيها عشان ما يفضلش سخن لمدة طويلة.

9# عدم معرفة صلاحية كل أكلة

التلاجة مهمتها تحافظ على الأكل لمدة أطول لكن المدة دي مش ثابتة. كل نوع أكل ليه صلاحية محددة في التلاجة ولو قعد أكتر منها هيبوظ، حتى لو متخزن صح ومفصول عن باقي الأكل

اقرأي هنا المزيد من المواضيع عن صحة سيدتي
https://goo.gl/yKnA9H