عجينة السكر

 عجينة السكر 

المكونات :
- 2 معلقة كبيرة سمن نباتي
- 280 جرام مارشميلو
- 2 معلقة كبيرة ماء
- 2 كوب سكر بودرة
- معلقة كبيرة نشا ( كورن فلور )
طريقة التحضير :
- ادهني الوعاء والمعلقة المعدنية المستخدمة بالسمن النباتى.
- حطي المارشميلو والماء في الوعاء ودخليه الميكروويف لمدة 50 ثانية. المارشميلو هيكون دايب نوعا ما , قلبيه بالمعلقة المدهونة بالسمنة عشان مايلزقش في المعلقة , وبعدين دخليه مره كمان في الميكروويف لمدة 15 ثانية اضافية لحد ما يدوب تماماً.
- ضيفي على المارشميلو كوب سكر بودرة وقلبي كويس , وبعدين ضيفي باقي كمية السكر بالتدريج وقلبي باستمرار لحد ما تحصلي على عجينة كثيفة.
- ادهني سطح العمل وإيديكي بالسمنة النباتية , واخلطي النشا بالقليل من السكر البودرة.
- رشي عجينة السكر بخليط النشا والسكر واعجني لحد ما يتجمع العجين وتحصلي على عجينة لينة ومتماسكة (العجينة هتكون بتلزق شوية فـ ماتقلقيش).
- احتفظى بالعجينة في كيس بلاستيك محكم الغلق وسيبيها ترتاح وتتماسك في الثلاجة لمدة 8 ساعات على الأقل.
ملحوظات:
- لما تيجي تستخدمي عجينة السكر اعجنيها مرة كمان على سطح مرشوش بالسكر البودرة.
- لوني عجينة السكر بالألوان اللي تفضليها ولكن لا يفضل استخدام ألوان الطعام السائلة.
- اثناء إستخدام عجينة السكر يفضل إنك تاخدي الكمية اللي محتجاها والباقي تحفظيه في كيس بلاستيك عشان ماتنشفش منك.
- افردي عجينة السكر وبعدين قطعيها بالقطاعات المخصصة ليها أو بقطاعات الكوكيز.
- تستخدم عجينة السكر بشكل أساسى في تغطية قوالب الكيك ولكن يفضل تغليف الكيكة الأول بكريمة السكر عشان عجينة السكر تلزق فيها كويس.
- ابدعي براحتك في صنع الأشكال المختلفة من عجينة السكر اللينة.