باستا فلورا بالمربى
المقادير:
- كبايتين دقيق
- كباية سكر بودره
- كبايه الا ربع زبده
- 3 بيضات
- معلقه صغيره فانيليا
- معلقه ونص صغيره بيكينج بودر
- رشة ملح
- معلقه صغيره لبن رايب او زبادي
- اي نوع مربى تحبوه انا بستخدم نوع مربى اسمه هيرو
طريقة التحضير
- ننخل الدقيق كويس ونخلطه مع البيكنج بودر والملح
- نضرب السكر مع الزبده بالمضرب الكهربائي أو المضرب السلك وبعدين نضيف لهم البيض والفانليا واللبن الرايب ونستمر في الخفق
- نضيف خليط الدقيق ونعجن بايدنا لحد مانخلط المكونات كويس مع بعضها والعجينه تبقى لينه ومتلزقش فى ايدينا.
- نحط العجينه في كيس بلاستيك ونسيبها ترتاح شويه في التلاجه حوالى نص ساعه.
- نطلع العجينه من التلاجه ونفردها براحه على رخامه مرشوشه بشوية دقيق.
- نفرد 3 أرباع مقدار العجينه في صينيه او قالب مدهون بالزبده ونمد العجينه في الصينيه كويس ونشيل من الزيادات اللي في جوانب الصينيه.
- نقسم كمية العجينه اللي باقيه لكور صغيره ونشكلها لشرايط طويله ونسيبها على جنب.
- نخرم العجينه بالشوكه ونغطيها بورقه زبده.
- ندخل الصينيه فرن حرارته متوسطه ونسيبها ١٠ دقايق لحد ما لون جوانب العجينه يتغير.
- نخرج الصينيه من الفرن ونشيل ورقة الزبده ونفردها بمربى التوت او اي نوع تحبوه ونزينها بشرايط العجينه بالطول والعرض.
- ندخل الصينيه الفرن مره كمان ونسيبها عشر دقائق لحد ما وش الشرايط يحمر.
ليست هناك تعليقات:
إرسال تعليق