الباتيه المورق بالجبنة حاجه كده تحفه
المقادير
نص كيلو دقيق منخول
معلقه كبيرة خميره فوريه
٤ معالق كبار سكر
٤ معالق كبار زيت
بيضه
رشة ملح
ماء دافئ للعجن حسب احتياج العجينه
زبده للتوريق
جبنه للحشو
الطريقه
الاول دوبت معلقة الخميره مع معلقة من السكر في ربع كوباية مياه دافيه وغطيتها وسيبتها تنشط وتتفاعل
قلبت الدقيق مع رشة الملح وضيفت باقي مقدار السكر والزيت والبيضه والخميره بعد التفاعل وابتديت اعجن بالمياه الدافيه بالتدريج لحد لما العجينه لمت عجنتها كويس جدا لمدة عشر دقايق لحد لما بقت ناعمه حطيتها في بوله وغطيتها وسيبتها في مكان دافي تخمر
بعد التخمير قسمت العجينه جزئين اخدت اول جزء فردته علي رشة دقيق علي شكل مستطيل ودهنته بالزبده كويس وقسمته ل ٣ اجزاء بالطول وبعدين قسمته تاني بالعرض يعني بقوا ٦ اجزاء هيعملوا ٦ قطع باتيه وحطيت الحشو علي طرف كل جزء انا حشيت جبنه بيضاء ولفيت عليها رول وقفلت الطرف كويس جدا
خلصت العجين كله بنفس الطريقه ورصيت الباتيه في صواني مدهونه بالزيت وغطيته وسيبته يخمر مره تانيه ويتضاعف حجمه
بعد التخمير دهنت الوش بصفار بيضه وعليها معلقة لبن ونقطتين فانيليا سايله ورشيت سمسم وحبة البركه ودخلته فرن سخن علي درجة حراره ٢٠٠ علي الرف الاقرب للارضيه لمدة عشر دقايق تقريبا لما اخد لون دهبي من تحت قفلت الفرن وشغلت الشوايه للوش
واول لما خرج رشيته رشة مياه بسيطه وغطيته بفويل عشان يفضل طري
.jfif)
ليست هناك تعليقات:
إرسال تعليق