8 نصائح للتعامل مع المراهقين

** خليكي صاحبتهم:

أهم حاجه لازم تكون بينك انتي وابنك المراهق، هي الصحوبية، انكوا تكونوا صحاب مش معناه الخروج سوا أو الهزار فقط، أنك تكوني صاحبتهم يعني بتفكري زيهم وبتحسي زيهم وبيكون ليكي نفس ردود الأفعال المتوقعة ليهم، ولو نجحتي أنك توصلي لده، هتنجحي تكوني صاحبتهم وتعدي مرحلة المراهقة مع ابنائك بمنتهى السهولة.

**التقدير والاحترام:

التقدير والاحترام أهم سمات بين أي علاقة فى العالم، وبينك وبين ابنائك لازم يكون فى تقدير واحترام متبادل، متتخيليش أن احترامك لابنك ورأيه وردود أفعاله ومواقفه بيساعده قد ايه يكون شخصيه ليه مستقلة وانك هتكوني ديما المرجع ذو الثقة الأول والأخير ليه من غير أي خوف.

** شيليه المسئولية:

ابنك بمجرد وجوده فى الدنيا هو بقي ليه شخصية مستقلة عنك، لازم تعوديه على ده من وهو طفل صغير، أنت ليك شخصية مستقلة وغير تابع ليا، وعشان تتعلم الصح محتاج تعرف الغلط، أنت ليك مسؤوليات ومحتاج تشيلها وتتحملها بنفسك، وده بيأثر فيه بشكل سريع وبتخلي الأولاد فى السن ده يقدروا قيمة الوقت والعمل وده هيوفر عليك كتير قدام.

** كبريه قدام الناس:

ابنك ممكن يكره التعامل مع الناس بسبب الصورة اللى بتوصليها عنه، مهم جدا أنك تكبريه قدام الناس وترسم له صورة كاملة حتى لو مش موجوده دلوقتي، لكن بمجرد رسمك للصورة دى هتخليه يحاول ويحارب ديما أنه يكملها ليكى فى الواقع.

اسمعي رأيه:

لو عايزة ابنك يسمع رايك ويحترمه، ابتدي انتي أنك تسمعي رأيه، وتطلبي رأيه بشكل خاص فى مواضيع خاصة بك، أو مواضيع تخص شؤون المنزل، ده بيساعد فى تعزيز ثقة الأبناء بأنفسهم وفي ابائهم بشكل كبير.

**احترمي مشاعره:

احترام مشاعر الأبناء وتقدير التغييرات المزاجية اللى بيمروا بيها، أحد أهم عوامل ونصائح للتعامل مع المراهقين ناجحة و هتساعدك تبني علاقة قوية مع أولادك.

** صاحبي أصحابه:

خليكي لطيفة دائما مع أصحابه واحترمي الاختلافات الشخصية بينهم، وحاولي تكسبي ثقتهم وحبهم لان ده هيخلي ابنك عنده ثقة فى التعامل معاهم ومعاكي.

** احترمي خصوصياته:

الخصوصية هي أهم شئ ابنك محتاج يحس بيه خاصة فى سن المراهقة، لأنه بيبتدي يكون ليه شخصية وبيبتدي يستقل بنفسه وبالتالي بيكون ليه خصوصيات من الممكن أنه يفضل الاحتفاظ بها بعيد عن أي حد، وعليك أن تحترمي ده حتى لو كان ممكن يسبب ليكي بعض القلق والتوتر.

تابعونا علي جروب الفيسبوك 👇

https://bit.ly/2KhnQVr