13 نصيحة لو بتشطب شقتك !

نصائح لتشطيب شقتك

بم اننا داخلين على موسم التزاوج فهنلاقى ناس كتير مننا مشغولين الايام دى فى تشطيب شقتهم وبما ان تقريبا معظمنا بيعتمد على نفسه فى تشطيب الشقه وبيبعد عن فكره المكاتب اللى بتستلم منك الشقه وبتقوم هيا بالتشطيب لان الموضوع ده مكلف الى حد ما .. فلازم تعرف شويه نصايح قبل ما تبدأ تشطب و تتعامل مع الصنايعيه

1- مبدأيا كدا ماتسيبشى اى صنايعى شغال مع نفسه او من دماغه فى الشقه لازم تبقى واقف على ايده او تجيبله حد فاهم

2- ماتخليش صنايعى يبدأ شغل فى الشقه الا وانت عارف حسابه هيكون كام وتأكد عليه اكتر من مره .. لانهم بيرجعوا فى كلامهم وممكن تلاقى الكلام اتغير .. ولو قالك مش هنختلف واللى تدفعه والكلام دا .. قوله شكرا هشوف غيرك

3- قبل ما تشتغل فى السقف والطى وكدا اتأكد ان الشقه اللى فوقيك السباكه بتاعتها تمام ..عشان ممكن اى تسريب عندهم يبوظ السقف ويقشره ..

4- سيراميك الشقه كله لازم يكون معمول ميزان مايه ويكون مايل على الحمام .. وبالذات السيراميك مينفعشى يعمله صنايعى مبتدأ عشان ماتحسش بمطبات وانت ماشى

5- السيراميك يكون فرز اول وبلاش اللون الاسود عشان مع الاستعمال بيتغير لونه .. وبلاش النوع المطفى خليك فى اللميع

6- حاول تبعد عن فكره تقفيل البلكونه عشان تكبر مساحه الشقه لان ناس كتير لما عملوا الفكره لقوا ان مافيش متنفس فى الشقه وخاصه لو انتوا مش بتوع نزول وخروج ..فالبلكونه بتفرق كتير

7- ابعد عن الحيطه السواحيلى ودى تحس انها واخده شكل ورق الحيطه المكرمش كده بس مشكلتها انها بتلم تراب اوى ومش عمليه بالمره

8- مفاتيح الكهربا والوشوش ركبها نوع غالى وبلاش تسترخص فيها عشان دى بتستعمل كتير اوى فلو جبت حاجه نضيفه من الاول هاتريحك بعد كدا

9- وصلات التكييف سواء وصله الكهربا او وصله المايه .. ناس كتير مش بتهتم بيها خاصه لو مش هيجيب تكييف فى اول الجواز بس نصيحه لازم تعملها عشان لو عملتها بعد ماتشطب هيبقى المنظر مش كويس

10- اوضه نوم الاطفال ماتخلهاش بعيده عن اوضه النوم بتاعتك .. لازم تكون اققرب اوضه

11- ماتبخلشى فى افياش الكهربا كل اوضه وزع افياشك وخاصه فى المطبخ والصاله لان دول اكتر اوضتين معرضين انك تنقل الاجهزه فيهم

12- المطبخ الامريكانى .. يعتبر غلطه كبيره وفكره الشباك اللى مفتوح على الريسيبش ده

13- نضافه شغل السباكه الداخليه اهم حاجه لان لو شغلها ماتعملشى كويس وكنت على ايد الصنايعى مع الزمن هاتكسر الحمام كله

يمكنك ايضا قراءة :

افضل ديكورات غرف الاطفال للمساحات الصغيرة بالصور

كيفيه اختيار غرف النوم مع تناسق الالوان